Timsedsay

        Imdukkal n tkellax

 

Yella yiwen wemγar di tallit tamezwarut, ila kuẓ(4) warraw-is. Kraḍ meqqrit, ssnen medden. Yiwen d ameẓyan, ur yessin yiwen. Amγar-nni γur-s yiwen umdakkel kan.

Nnan-as warraw-is: „Nekkni γur-neγ imdukkal aṭas.” –Yenna-yasen: “Imdukkal-nwen ur nfiεen ara.» Yenna-yasen: γur-i yiwen umdakkel yif akk imdukkal-nwen !“ –Nnan-as: „Lhan imdukkal-nneγ a baba !» -Yenna-yasen: „A nuqmet yiwet tnaεurt. A nceyyeε i imdukkal-nneγ; Anwa ara d-yasen ad idebber fell-aneγ. “ –Nnan-as: “Acu n tnaεurt-agi ? » -Yenna-yasen : « Nγet-d ilef. “ Ruḥen; ṭṭfen-d yiwen yilef. Nγan-t, rran-t γer tesga. Dlen-t s yiwen uceṭṭiḍ. Yenna-yas i umeqqran deg-sen: „Ruḥ tura, a mmi, ar imdukkal-ik s i tettzuxxuḍ, in-asen a d-asen. A nẓer tura ma ad tafeḍ yiwen ara d-yasen ad iḍebber fell-ak. “ Iṛuḥ mmi-s nni, yenna-yas: “A baba, acu unamek imi a sen-iniγ: ad tḍebbrem fell-i ? Γef acu ad ḍebbren ?” –Yenna-yas baba-s: “Ini-yasen: Aqlaγ nenγa yiwen imekreḍ iḍelli. Amek ar as-neg ?”

Iṛuḥ mmi-s nni ar imdukkal-is, yenna-yasen: “A imdukkal-iw, aqli-n nγiγ yiwen imekreḍ iḍelli. Tura εewqeγ amek ar as-geγ. Ma yella kra n wayen ad tḍebbrem fell-I ?” –Nnan-as: “ur nezmir ara a nḍebber di tγawsa-yagi.» Yuγal-d s axxam. Yenna-yas: “A baba, ur ufiγ ara yiwen ara iḍebbren fell-aneγ deg imdukkal-iw.»

Yenna-yas baba-s i wayeḍ: “Ruḥ ṭra keččini γer imdukkal-ik.» Iṛuḥ. Ur yufi ula d yiwen ula d netta. Yuγal-d, yenna-yas: «A baba, ur ufiγ yiwen ula d nekkini.»

Yenna-yas baba-s i wayeḍ: “Ruḥ diγ keččini.” Iruḥ winna, diγen, wis kraḍ nni. Ur yufi yiwen ula d netta. Yuγal-d, yenna-yas: «A baba, ur ufiγ yiwen, ula d nekkini.»

Yenna-yasen: „Yak, nniγ-awen: ur ssugutet ara imdukkal. Uqmet yiwen umdakkel n tidett yif aṭas n yemdukkal n tkellax.“ Yenna-yas i umecṭuḥ-nni: „Ruḥ keččini, a mmi, ar umdakkel-iw, in-as: „La k-yeqqar baba: Eyya, as-ed ad tḍebbreḍ fell-i amek ad geγ ?»

Iṛuḥ weqcic-nni, yewweḍ ar wemdakkel-nni n baba-s, yenna-yas: „ A mass, a k-yeqqar baba: nenγa yiwen umakur iḍelli. Tura, as-ed. Amek ar as-neg ?“ –Yenna-yas umdakkel nni n baba-s: „ihi s yexf-iw ! Ar d-εemmreγ abeckiḍ-iw. Ula d nekk ar s-rnuγ tiyita inu deg-s. » Yusa-d, yedda-d akk d weqcic nni. Yewwi-d abeckiḍ akk yid-s.

Armi d-wwḍen, yenna-yas: Acu γef i d-tuzneḍ γur-i ay amdakkel ?» -Yenna-yas: “Ay amdakkel, nγan warraw-iw yiwen umakur. Tura ceyyεeγ-ak-in ad tḍebbreḍ amek ar as-neg. » -Yenna-yas umdakkel-nni ines: “Anda yella ? Ad rnuγ deg-s tiyita inu. »

Yenna-yas : « Atan deg tesga, idell s uceṭṭiḍ, idell s uceṭṭiḍ.”

Iṛuḥ γur-s, yerfed-as aceṭṭiḍ, yufa-t d ilef. –Yenna-yas:”Ay amdakkel, wagi d ilef aya !” –Yenna-yas: “Ihi, d ilef ay d-neṭṭef nekk d warraw-iw. Bγiγ ula d kečč ad teččeḍ deg-s. Ceyyεeγ-ak-in γef iddra-s akken a d-taseḍ ad teččeḍ deg-s.” –Yenna-yas: “ihi nekkini usiγ-d ad ḍebbreγ. Γileγ dγa d amdan ay tenγam; A t-nawi ar yilel, neγ a t-nemḍel deg iḍ, neγ a t-ḍeggreγ ar kra yeγzer i wakken ur isell yiwen. Imi d ilef ay d-ufiγ, tanemmirt-nwen, imi yi-d-temmektam; aksum yilef mačči yal ass."

Yenna-yasen wemγar-nni i warraw-is: «Yak, nniγ-awen: ur γur-wen ara imdukkal ara ken-isellken deg tegnit n ddiq !”